បន្ទាយមានជ័យ៖ ផ្ទះពលរដ្ឋចំនួន ៣៥ខ្នង ក្នុងស្រុកថ្មពួក និងស្រុកស្វាយចេក ត្រូវបានខ្យល់កន្ត្រាក់បក់បំផ្លិចបំផ្លាញនៅល្ងាចថ្ងៃទី១៧ ខែមីនា ឆ្នាំ២០២២។
យោងតាមរបាយការណ៍នគរបាលស្រុកស្វាយចេកបានឱ្យដឹងដែរថា នៅវេលាម៉ោង ៥និង៣០នាទីរសៀលថ្ងៃទី១៧ ខែមីនា ឆ្នាំ២០២២ ខ្យល់កន្ត្រាក់បានបំផ្លាញផ្ទះរបស់ពលរដ្ឋចំនួន៦ខ្នង នៅភូមិចំការគ ឃុំស្វាយចេក ស្រុកស្វាយចេក បណ្តាលឱ្យរបើកស័ង្កសីអស់ចំនួន ៦២សន្លឹក មួយម៉ោងក្រោយមកពោលគឺនៅម៉ោង៦និង៣០នាទីរសៀល ខ្យល់កន្ត្រាក់ដូចគ្នាក៏បានកើតឡើងក្នុងស្រុកថ្មពួក នៅឃុំគោករមៀត ដែលបានបំប៉ើងដំបូលផ្ទះពលរដ្ឋចំនួន ២៩ខ្នង បង្កការខូចខាតជាច្រើន។ ទោះជាយ៉ាងណាហេតុការណ៍ទាំងពីរនេះពុំបានបង្កគ្រោះថ្នាក់ដល់អាយុជីវិតមនុស្សនោះទេ។
បច្ចុប្បន្នអាជ្ញាធរមូលដ្ឋានកំពុងជួយសម្របសម្រួល និងជួយសាងសង់ផ្ទះពលរដ្ឋពីការខូតខាតទាំងនេះផងដែរ៕